Kelmtejn dwar l-awtriċi

Fl-2007 Jacqueline gradwat bil-Baċellerat bl-Unuri bħala għalliema tal-Malti u tal-PSCD. Tul il-karriera tagħha mhux biss għallmet dawn iż-żewġ suġġetti iżda għamlet ukoll 4 snin taħdem fil-qasam ta’ Guidance/ Counselling. F’dan iż-żmien, kif ukoll fis-snin kollha taħdem b’mod dirett mal-adolexxenti, kellha l-opportunità tiltaqa’ ma’ bosta żgħażagħ. Dan għenha tkun qrib, tifhem aħjar u tibqa’ aġġornata ma’ dan il-perjodu tant sensittiv tal-ħajja, liema perjodu jirrappreżenta l-qofol tal-kotba li kitbet. Fil-preżent Jacqueline għandha 36 sena, miżżewġa lil Jonathan u għandhom żewġt itfal; Matias u Jade. 

Jacqueline Mizzi, hija l-awtriċi ta’ tliet rumanzi bil-Malti, kif ukoll ktieb ta’ taħriġ. Fl-2015, ‘Horizons Malta’ ppubblikaw l-ewwel ktieb tagħha ‘Esperjenza Unika, Love’, li ġie milqugħ tajjeb ħafna mill-qarreja. Dan għaliex f’sitt xhur biss minn meta ħareġ għall- bejgħ ġie sold-out u reġa’ ġie stampat għat-tieni darba. Kien ukoll wieħed mill-Bestsellers fl-istand tal-Horizons waqt il-Festival Nazzjonali tal-Ktieb tal-istess sena. Konsegwentament, wara s-suċċess li kellu dan il-ktieb, din l-awtriċi ħasset li l-istorja kellha tkompli, u fl-2016, ħarġet it-tieni ktieb bl-isem ta’ ‘Esperjenza Unika, Sabrina. Kien f’din l-istess sena li l-ewwel ktieb tagħha reġa’ ġie stampat għat-tielet darba konsekuttiva. Fl-2020, Jacqueline ippubblikat ktieb ieħor, din id-darba ta’ taħriġ, għal studenti fl-ewwel sena tas-sekondarja, bl-isem ‘Ninvestigaw il-Każ’. Dan huwa ktieb ta’ analiżi letterarja, bl-intenzjoni li jgħin lill-istudenti jieħdu gost jitħarrġu fl-analiżi kritika ta’ testi letterarji. 

‘Noti Blu’ huwa l-aħħar xogħol ta’ Jacqueline Mizzi li se jkun qed jiġi ppubblikat fil-ġranet li ġejjin. Għal darb’oħra, din l-awtriċi għażlet li tikteb ktieb ta’ qari għall-adolexxenti, kif ukoll għal dawk l-adulti li jieħdu gost jerġgħu jesperjenzaw u jaraw il-ħajja minn għajn żagħżugħa.

Matul din is-sena wkoll, wara d-domanda li kien hemm għar-rumanzi ‘Esperjenza Unika, Love’ u ‘Esperjenza Unika, Sabrina’, Horizons iddeċidew li wara snin sold-out, jerġgħu jistampawhom mill-ġdid.